Сосема е извесно дека бројката од 2.500 до 3.000 македонски навивачи само од Шведска е реална, а не се знае колкав е бројот на оние што го најавија доаѓањето од Данска, Норвешка, Германија, В. Британија и од Македонија

ИДНАТА НЕДЕЛА ПОЧНУВААТ ОЛИМПИСКИТЕ КВАЛИФИКАЦИИ ВО РАКОМЕТ

На една недела пред почетокот на квалификацискиот турнир за пласман на Летните олимписки игри, атмосферата во Гетеборг (Шведска) почна повторно да добива на интензитет. Секој ден има понекоја нова, свежа информација. Македонската ракометна репрезентација од 6 до 8 април ќе игра во квалификациите против Унгарија, Бразил и домаќинот Шведска. Најдобрите две селекции ќе се пласираат на ЛОИ во Лондон.

Деновиве се обидовме да добиеме конкретна информација за продадените билети, и тоа особено за нашите, македонските навивачи. Ниту една од трите посочени адреси не располага со релевантни податоци за тоа колкав број билети откупиле македонките навивачи. Билети откупувале сите што се регистрирани како здружение - културни друштва, спортски здруженија, здруженија на станари итн.
Понудата да се добие дневен билет за само 100 шведски круни е искористена докрај. Колкав дел од овие билети се наменети за гости од Македонија, не се знае.

Секторите резервирани за македонските навивачи, М и Н, се пополнија за два дена, а во секторите Ј, К, Л, П и О останаа само билети од 350 круни (една круна е 6,8 денари) и билети од 510 круни. Сосема е извесно дека бројката од 2.500 до 3.000 македонски навивачи само од Шведска е реална. Колкав е бројот на оние што го најавија доаѓањето од Данска, Норвешка, Германија и од Велика Британија не се знае, а засега нема никакви податоци за бројот на навивачи од Македонија.

- За нас турнирот почнува на 4 април. Репрезентативците ќе бидат наши гости тој ден. Ангажиравме професионални фирми, кои ќе ги донесат репрезентативците во друштвото и ќе ги вратат назад. Искусни и професионални фирми ќе ја подготват и сервираат вечерата. Никакви импровизации не се дозволени. Нашите момчиња го заслужуваат најдоброто. Ние од сѐ срце ќе се потрудиме да им посакаме пријатно добредојде, потоа ќе ги оставиме намира, а на 8 април веќе подготвуваме голем заеднички хепенинг во еден објект близу Скандинавиум - ни изјави Тане Ангеловски, претседател на друштвото „Гоце Делчев“ од Гетеборг.

Спортското друштво „Вардар Македонија“ ќе биде отворено цело време додека трае турнирот.
- Ќе се обидеме да организираме навивачки центар. Повеќе детали ќе имаме деновиве, откога ќе завршат консултациите во рамките на управниот одбор за 24-часовното функционирање на клубот за време на турнирот - ни изјави Трајан Масев, секретар на друштвото.

Вратите на македонскиот православен храм „Св. Кирил и Методиј“ во Гетеборг ќе бидат ширум отворени за сите добронамерници од каде и да се, вели Милан Стојчевски, претседател на управниот одбор на црковната општина.

- Кафе и посен колач, поради велигденските пости, ќе им понудиме на сите, а оние што ќе нѐ удостојат со своето присуство на светите литургии по повод христијанскиот празник Цветници, ќе се обидеме пријатно да ги изненадиме - ни рече Стојчевски.

Социјалните мрежи се полни со прашања за секојдневието во Гетеборг. Се одвива многу жива комуникација, која дава отворена надеж дека бројката на навивачи допрва ќе добива големи димензии.

Репрезентативците од утре во Скопје

Македонската ракометна репрезентација се очекува утре да се собере во Скопје, на почетокот на подготовките за квалификациите за Летните олимписки игри (ЛОИ) во Лондон, кои се играат во Гетеборг, Шведска, од 6 до 8 април. Противници на црвено-жолтите ќе бидат домаќинот Шведска, Унгарија и Бразил. Првите две репрезентации од групата ќе играат на ЛОИ.

Автор: Ацо Каланоски специјално од Гетеборг за „Нова Македонија“